Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
Boatmen nabbed on molest charges |  Teen reported missing found electrocuted |  Census on stateless, undocumented individuals |  PM:    Najib's 'I don't know about 1MDB' lame excuse |  Sabah captain Rawilson set for first national cap |  Nine top MTJA juniors for tournament |  Moves to protect marine resources |  MAWILLA 2 poundohion kumaa hongkod kavavagu |  Iso uvang, iso pomounan: Madius |  SONGKOSUVAZAN MINONINDUO MOGIIGIZON HAMIN DI SINUANG |  Up to 40 pct off with MAS’s Mid-Year Deals |  Aidi ziarah Rumah WargaTua Prichard, Hospital Papar |  Wakil rakyat lapor SPRM, dakwa ada monopoli dalam pembekalan ubat |  Kiulu destinasi lawatan wajib, sasar 1 juta pelancong menjelang 2025 |  Stephen minta PBT percepat bina Terminal Bas Bersepadu Sandakan | 
 Kadazan Dusun

KINOGUZUAN TANA KOINDUVO MALIM NUHU OTOONONG MINTAMONG KOOZUZUVO

10th March, 2018

KUNDASANG: Sokid insan po vagu nokopiuman kinoguzuan id Nuhu Kinabalu minokianu do malim nuhu montok mintamong koozuzuvo sumusuut mantad kinoguzunan tana di uha-uha notoguvang do Ranau di totuvong koniab.

Jemain @ Jabili Midin, 50, minoboos sundung tu kinoguzuan timpu diti au miaga pinuod ontok di 2015m nga kakal isido kivaa topiumanan koosi.

“Sundung i do ingkaa, kosoou zou do tumoonong montok tutumakad id doiho (Panalaban).

“Koubasanan dino, songian kivaa koguzuan, izikoi (malim) mogovit tutumakad kumaa tampat tumimung id nombo popotoonong izikoi tutumakad,” ka disido kuminaa Bernama ontok nasamanan id Taman Kinabalu id doiti.

Jemain vookon 42 malim id Laban Rata Resthouse id Panalaban, i nogi titik tumbazaon tutumakad poguhui mongoput katakadan kumaa savat nuhu kikinavas 4,095 meter dino.

Iso kinoguzuan tana uha-uha kitukuan 5.2 id skala Richter nokoguzu Ranau di j am ko 9.06 totuvong koniab. Kinantakan dino nontodonon piipio uvang miaga do Kudat, Tuaran, Papar, Kota Marudu, Kota Kinabalu om Kundasang nga nokopiuman kinoguzuan dino.

Songuhun vagu malim nuhu Hanson Juhili, 35, i koinsan nogi nokopiuman kinoguzuan tana id Panalaban, kobohingkang popointahang topiumanan koosi ontok kinantakan totuvong koniab.

“Kuozon po nodii. Koozuzuvo nantakan ingkaa. Avasi po tu aiso nosinduahan. “Id suang koozuzuvo di koundoos dino, izikoi malim nuhu mositi tumoonong om poposoguhu koumohigan tutumakad,” ka disido.

Jomius Binte, 54 vagu monongkotohuod koozuzuvo id Panalaban atamangan, sundung tu kivaa tutumakad i noundoosi saasabap no do kinoguzuan kuang hobi onom second dino.

“Kahapas dagai saviavi aiso ingkuukuo nokoindau id Timpohon Gate (titik ponimpunan tumakad), noonuan izikoi taakanon.

“Ontok timpu dino (ontok minakan), okito ku ogumu tutumakad nouzan. Kivaa di minodop miampai kihapik nongon id meja, kivaa di tuutulus guminuhi id hotel dioho,” ka disido om minoboos kogumuan tutumakad mantad suang pogun, Korea om Eropah.

Naamot dino, Koupisan Bomba om Manampasi Malaysia (JBPM) Sabah pinopoimagon duvo tutumakad koonduan noovit kumaa Hamin Pongusapan Ranau tu nokotoguvang Toluo Akut Gunung (AMS) ontok umunduk id nuhu.

Kiginumu 239 tuhun, kaampai no 130 tutumakad id Panalaban ontok kinantakan om noovit umunduk kuminaa Timpohon Gate do Tinimungan Mogigium om Manampasi Nuhu (Mosar) tuminimpuun di jam ko 9.40 totuvong om kalaja nopupusan di jam ko 4.30 minsusuvab.

Montili Kotombuhuzan, Koubasanan om Sandad Posoihi Sabah Datuk Masidi Manjun minonuu mooi saviavi abaabazan tumakad Nuhu Kinabalu potoodon naamot i pinotimpuun tuutulus.

Naamot dino, kinotombuhuzan Bernama noihaan koozuzuvo id Timpohon Gate aiso nuununu miampai do abaabazan.

Koozuzuvo id Taman Kinabalu nga otoonong miampai piipio tinimungan tutumakad, saviavi dioho mantad tinimungan tutumakad suang pogun, suminakai do padsakazan tutumombuhui montok guminuhi id Kota Kinabalu.

Koozuzuvo id Kundasang nga anavau di minsusuvab miampai abaabazan potitikid tadau id kakadazan kapanau miampai koubasanan. Bernama

   
Email Print
   
 
 
E-browse