Local
Business
Sports
Leisure
BM
Kadazan Dusun
EDUCATION
Archives
Latest News
 
Nst-studio
OPPO A3 invades the market |  Pink Evans muncul dengan single pertamanya "Jujur ku tak bisa" |  Isu bekalan air bersih di Ranau akan diatasi: Abidin |  Kes denggi di Labuan meningkat 62 kes |  Agong sokong langkah berhemat, pemansuhan GST |  Sabah Ports and Harbours Dept Director among four remanded for bribery investigation |  Pygmy elephant found dead on oil palm plantation |  Sabah has the most unemployed graduates in country |  Shafie the right man for the job! |  Matlan: Nominate suitable candidates! |  MAGANU HAANG KUMAA KOMPONI AU NAKAHANTOI MINOMONGO VOKOK VAIG ID BEAUFORT |  Norzawiyah, koonduan koiso sabaagi Potunud JaPen Sabah |  Potunud, tohu kuntilikto nokogompit susuap tinaan naamot |  USCI medical and pharmacy roadshow |  Welder Training Programme for Sabahan youth | 
 Kadazan Dusun

John D Mingkui umampai id kinaramaion seni tuunion Sabah

130318adv-artis140318
John

14th March, 2018

Di RAPHIEL PINUS

JOHN D MINGKUI, iso’ ngaran i amu’ po doti’ songkuro nointutunan id kagaan susuminding kosuul no id Sabah. Nga’ mantad kinosoliwanon do ‘single’ dau i ki’uhu do ‘Ompunai Oku’, artis nokoiyonon mantad Kampung Taginambur, Kota Belud diti pikiikiro doti’ do koposurat ngaran poingulud di tongo’ artis nokoiyonon suai i alaid no do nointutunan.

Sinding sinupuan di monsuusupu’ wagu, i Yapai Sinalim dilo’ katatalib do kolulusan RTM om nokotimpuun pinoporongou kumaa ginumuan pointonod di kolimpuunon wulan diti om nakaanu raramit di kounsub mantad tongo’ mokikinongou.

Loyou i koposusui piniadaan doid piupusan dilo’ pogulu diti nopointutunan id luan Facebook, FH Production pointonod di wulan Koiso’ toun diti om maan porumposo’ doid album pogiomungan pinosolimbou do FH Production, ‘Sinding Saliguor Nabalu’.

Mantad tomulok

Naamot dino, pinopoilo i John do iman-imanon dau sumili momolihis pointonod po di tokoro’ po yau om montok monuang timpu osimbayan, orohian yau do suminding karaoke.

“Orohian oku do suminding om maganu timpu suminding karaoke id walai,” ka dau i pinopoilo do suai ko’ mantad kasagaan sondiri’, nakaramit nogi’ yau do sokodung om pongunsuban mantad mogiadi’ dau, koobpinoian om koombolutan.

“Tilombuson ku kororohian ku diti om sumili do songulun moomolihis,” ka dilo tanak ko’onom mantad walu’ mogiobpinai diti.

Minongomi do sinding ‘single’ dau sabaagi impuunon laang mamagampot iman-imanon sumili moomolihis, ka di John i babaino’ diti poingkaraja’ id songinan komponi monunukat poriwit doid Kota Kinabalu, ounsikou yau soira’ sinding dilo’ noutip doid Studio FH Production, pasanganu di artis nokoiyonon Sabah i Freddy Harmthon.

Pinoposusuui nawaawaya’an dau po’ompus kinopongutipan do sinding dau dilo’, ka di John ogumu’ posodiaan i asansagan dau do pinopowonsoi kaampai no pingludaan potitikid tadau amu’ momuntuk do timpu.

“Nokoumbal oku tinagur di mononorina’ ku do poingkaraja’ sabab suminding oku do timpu kumaraja’,” ka dau. Poingkuro po ka di John, mantad no do amu’ asaga’ kapakaus di minonsupu’ do sinding dilo’, mininggisom yau do papatahak di bobos tosonong loolobi no kopio ontok minongutip do sinding nokomoi.

“Asansagan oku minsingilo dilo’ do sodop om tadau,” ka dau i pinopoilo do suminding montok pongutipan om minsinding toomod, osodu’ pisuayan.

“Kopongutipan kapaampai do kopurimanan om tonggungan. Sundung pia do olidas oku di ontok kinopongotipan dilo’, nga’ opurimanan ku do ongolomok po tinan ku.

“Ilo’ no nawaawaya’an kumoinsan ku om mongunsikou oku kopio dilo’,” ka di John kawagu.

Album sondiri’

Karait kokomoi kogompitan dau doid kaganaan seni, ka di John toi ngaran otopot dau i Elysah Dimis, gisom baino’ diti nokopodsupu’ yau do tolu sinding om kiangkab do tumilombus modsupu’ sinding montok pomongo do album solo i nosili iman-imanon dau mantad di tokoro’ po yau.

Ka dau pointonod do sinding Ompunai Oku nakatayad doid Facebook di kolimpuunon wulan Koiso’, ogumu’ koombolutan i ruminomut dau om minokianu dau do monsinding sinding sinupuan diolo’.

“Iti nopo nga’ koyuon di osonong om pongintodan di osonong kumaa doho’ sabab nonuan kotumbayaan mogowit di tongo’ sinding sinupuan diolo’.

“Monongkounsikou oku kumaa diolo’ om kosiwatan diti amu’ ku pararamaon loolobi no do yoho’ nopo nga’ kotitimpuun nogi’ id kaganaan diti om osodu’ po pamanahon,” ka dau.

“Ogumu’ i kiguno ku do pinsingilaan mooi do kosindak id kaganaan momolihis diti,” ka dau kawagu. Pinopolombus nogi’ i John do kopongunsikohan kumaa ngoduo molohing dau, kolominan om koombolutan mantad sokodung i naramit.

“Kalansananku tongo’ mokikinongou kapamaramit do single kumoiso’ ku diti, i mitilombus kapamaramit kinorikotan ku doid kaganaan suminding id Sabah suai ko’ monokodung di tongo’ sinding artis nokoiyonon ngaawi’ di suai,” ka dau.

Suai mantad dilo’, monongkounsikou nogi’ yau kumaa do FH Production i minonguhup gisom nokosoliwan single dau dilo’, kaampai nogi’ kopointutunan maya’ media om laman sosiol.

   
Email Print
   
 
 
E-browse