Local
Business
Sports
Leisure
BM
Kadazan Dusun
EDUCATION
ECO
Archives
Latest News
 
Nst-studio
Kerajaan digesa selesai masalah mendapan pasir sungai Tampasuk |  Lebih 60 rumah rosak di Tanjung Batu Laut akibat ribut, hujan |  60 hamin noumbak tu tongus topuod id Tawau |  Overseas stint for Sabahan Masturah |  Shuttler Goh wins men’s singles |  Ben among stellar cast |  Senior police officer fined RM20,000 for having illegal immigrant in house |  More charter, extra flights to Sabah |  Fighting cocks possible H5N1 source according to Junz |  Green turtle likely killed by boat propeller |  Death of elephants haunts Minister |  Over 60 houses damaged in storm |  GBS will be new opposition bloc |  Ministry starts working on solving Sabah unemployment issues |  Pemegang kad pengenalan merah lebih 60 tahun diberi taraf warganegara: PM | 
 Kadazan Dusun

Bintang P. Ramlee Zon Sabah tadau Ko’onom diti

9th August, 2018

KOUPISAN Posolimbahan Malaysia Sabah, maya’ do Seksyen ‘Hiburan dan Muzik’ do insan po, papaanjur Pialaan Panantaban ‘Bintang P. Ramlee’ Nayatan Zon Sabah 2018 do ko 11tw Kowalu’ diti, koontok do tadau Ko’onom mintonod jaam ko 1.45 talib tanga’adau doid Studio TV RTM Kompleks Bersepadu (KKMM), Kota Kinabalu.

Tuduan do kopongonjuran pialaan dilo’ do wookon nopo nga’ montok momologkus bakat suminding, lokunan om ponumpoirak, mongunsub kororohian mogiigiyon kumaa tataba’ kosonian pomogunan, momuhondom om mamagatang karya seni Seniman Tabaal Tan Sri Dr. P. Ramlee, mongingkawas piromutan pisokodungan id kaganaan koposolimbahan miampai do Pogun Brunei Darussalam, Singapura om nogi’ Indonesia.

Gisom baino’ diti, Pialaan Bintang P. Ramlee nokoponsupu’ do bontugan mantad Sabah, wookon nopo nga’ io’ Juraimi Ahmad dii Salamah Osman (2004) om io’ Fairuz Misran dii Azeani Awang di toun 2012.

Do toun diti, kotonudan pinoukab kumaa diolo’ i kiumur 18 gisom 45 toun, ilo’ nopo nga’ yolo’ i nosusu id pialatan 1973 gisom 2000.

Tongo’ tutumanud i pinili’ monongkiala’ montok nayatan Zon Sabah, ruminapou doid ujibakat i pinoindalan doid poliliput pogun pogulu diti kaampai no id Kota Kinabalu, Keningau, Tawau, Sandakan om Watas Pisompuruan (WP) Labuan.

Nosusuhut dilo’ onom piboi kapaampai do tolu kokusaian om tolu koonduan nopili’ montok monongkiala’ id nayatan Zon Sabah montok pilion mongobi’ pogun diti kumaa pialaan nayatan kabansaan i pohoroon id Stadium Perpaduan, Petra Jaya Kuching, Sarawak do ko 6tw Kohopod do orikot.

Piboi nopo ngaawi’ dilo’ nga’ ii Arjayani @ Fuad Ajad mongobi’ Kota Belud, Mohd Burhan Ayub (Papar) om i Mohd Syazrul Nizam Matusin (Beaufort) montok bohogian kokusaian om ii Maizatul Asfa Marzuki (Membakut), Jamila Hanchus (Sandakan) nogi’ i Rafidah Asgali (Sandakan) monongkiala’ montok bohogian koonduan.

Aanu do komoyon, finalis ngaawi’ do toun diti okon i ko’ aalang-alang tu’ haro diolo’ i nokoumbal nakatanud pinialaan diti di pogulu diti, miagal di Arjayani songulun mongiingia’, nokoumbal nosili finalis Bintang P. Ramlee Zon Sabah di toun 2016, i Mohd Syazrul Nizam songulun momolihis om momonsoi pokiikitonan ‘puppet’ nokoindikau taang kotolu Bintang P. Ramlee Kabansaan id Kuching, Sarawak.

Montok di Mohd Burhan, sundung kinotonudan disio diti i kumoinsan nogi’ montok pialaan Bintang P. Ramlee nga’ orohian mokinongou sinding-sinding laid om sinding-sinding di P. Ramlee suai ko’ asaru’ tumanud ponongkialaan suminding i kaanjur mogisusuai bohogian.

Montok di finalis koonduan, i Maizatul Asfa nopo nga’ finalis Bintang P. Ramlee Zon Sarawak di toun 2014, naamot dio’ Jamilah dii Rafidah kinawaawaya’an togumu’ maya’ kotonudan id mogisusuai pialaan suminding.

Id pialaan nayatan Zon Sabah, tikid piboi mogowit iso’ sinding ‘wajib’ loyou di P. Ramlee, om iso’ sinding koduo nopo nga’ piampatan (duet) i sinding pinili’ mantad filem-filem lokunan di P. Ramlee.

Montok di kalantoi, suai ko’ kopongobi’ do pogun kumaa pialaan nayatan kabansaan, karamit nogi yolo’ do tutungkap koimbayat kapaamai do tusin RM2,000 montok bontugan, suai ko’ trofi om setifikit, naamot duo tutungkap ‘saguhati’ tusin RM700, trofi om setifikit montok ngoduduo bohogian koonduan om kokusaian.

Kumaa di mio’ontong, okon nopo ko’ kokito dilo onom piboi monongkiala nga’ nogi’ lihison yolo’ di duo artis nohodi do RTM Sabah, yolo’ nopo nga’ io’ Fairuz Misran dii Azeani Awang.

Naamot montok popolombus pialaan dilo’ nopo nga’ i DJ Denis Primus (Sabah VFM) om i DJ Sabrina Baas (Sabah FM). Piboi ngaawi’ ompoton do monguni-uni RTM Sabah i buruanan di Raimond Sukudat @ Matlan sabaagi mongungulud tuunion om adangon pialaan dilo’ di momimilantoi tabaal nogi’ kinawaawaya’an.

Tulun ginumuan kasaga’ nogi’ do mokinongou pialaan dilo do mitilombus maya’ kosolimbahan Sabah FM. Suai ko’ kopongutipan rodiu, pialaan diti tiipon nogi’ do poinpooponu’ do Unit Koposolimbahan TV RTM montok kosolimbahan RTM TV2.

Kohondot dilo’, tulun ginumuan loolobi no yolo’ i orohian do tongo’ sinding-sinding di P. Ramlee alapon rumikot mooi panahak sokodung kumaa di toinsanan finalis om mamaramai po do pialaan dilo’.

Uhu do pialaan nopo nga’ ‘Sepanjang Zaman’ om kosuangon mooi intong nopo nga’ aiso’ kabayar.

   
Email Print
   
 
 
E-browse