|
10th March, 2010
KOTA BELUD: I Montiri Kopotundaan Labus Kakadayan Datuk Dr Ewon Ebin minokianu di toinsanan agensi poinggompit doid ababayan Agropolitan id Kota Belud do monginsikap kopoindalanan dilo’ i babaino’ diti nokourut osodu’ ko’ mantad timpu di nakatatap.
Ka disio, poruntukan kopoindalanan di agayo kopio dilo’ nokosodia’ no do koporintaan maya’ do Koridor Kopotundaan Sabah (SDC) om koiyonon do kopoindalanan nga’ nointutunan, poingkuro po, komogoton do kopoindalanan dilo’ kakal amu’ okito.
“Ahal miagal diti amu’ apatut aantakan… koinsanai kobolingkahangan kiguno soibahan tosisikap, kada’ indad gisom do kotoguang o projik tagayo dilo’ do ralan pointobon toi amu’ aanu papapanau tu’ tohuri nopo nga’ kopomorugi’ do toinsanan,” ka disio.
Wokon nopo di nogompit id kopoindalanan ababayan diti nga’ kaampai no Bohogian Kikuasa’ Kopotundaan Ikonomi om Kopoopuan Sabah (Sedia) sabaagi popoindalan projik, Kotinanan Pomorunan Gata’ Sabah (LIGS), Upis Watas, Koupisan Tana’ om Monunukat, Koupisan Tayam om Kotinanan Kopotundaan Pomuwalaian om Kakadayan.
Ka disio, tongo’ agensi di poinggompit dilo’ kiguno kitinonggungan popoindalan karaja’ diolo’ sompopori suai ko’ sopisokdoung sompi’ tiso’ om tiso’ miampai amu’ maganu timpu di adalaan kanaru montok manalasai nunu-nunu kobolingkahangan di haro.
Sabaagi montiri kitinonggungan doid ahal dilo’, pinosotol di Ewon do amu’ isio asaga’ mokinongou nunu-nunu padaahan di amu’ kosudong mantad nombo-nombo agensi poinggompit.
“Ruputan kaawagu kokomoi kinomogoton do ababayan diti kiguno uludon do po’ompus timpu,” ka disio pinoposotol.
Minoboros isio dilo’ di maso minokinongou kopointalangan kokomoi do kinomogoton ababayan agropolitan dilo’ doid Upis Watas Kota Belud kopihondot kinotombuluyan karaja’ poinbida’ disio om tinonudan kuminaa koiyonon projik nokomoi id Kampung Pintasan om Rosok.
Pointonod di toun 2008, duo tinan kampung id watas diti ilo’ nopo nga’ Kampung Pintasan om Kampung Rosok/Surun pinili’ sabaagi koiyonon kopoindalanan ababayan agropolitan maya’ pomogompian sapi’ (Pintasan) om tanom gata’ (Rosok/Surun).
Poingkuro po, haro kobolingkahangan doid Rosok soira’ tana’ di gunoon amu’ korungod sasabab no do wokon mantad di tana’ pinaatag dilo’ id watas ponimbuuhan waig suai ko’ haro kagagaan mantad mogigiyon.
Kohondot dilo’, pinokianu di Ewon o Koupisan Tana’ om Monunukat do mongintutun di tana’ koporintaan id pososorili’ koiyonon nokomoi montok momogonop watas di gunoon.
Id kinotombuluyan dilo’, nowit po nogi’ i Ewon minongoi intong doid Bingkil Tinunturu’ Tenunan Sigar id sahau komontirian disio doid Kampung Rampaian Laut.
Nakaampai po nogi’ di kinotombuluyan dilo’ i Panakadai Montiri Datuk Sairin Karno, Panakadai Montiri Pomutanaman om Pomorunan Takanon i Datuk Musbah Jamli, Puru Lintuhun Koundangan Pogun (Adun) Kadamaian i Datuk Herbert Timbun Lagadan, Monunurat Pointatap Komontirian Datuk Ghulam Jelani om i Upisor Watas Muhd Najib Muntok.
|
