|
|
|
TUMONOS… iso mantad pahou id Bavang Pegalan di tumimpuun no mimang koing id Keningau.
|
15th March, 2010
KENINGAU: Maso oindamaan o kotonosan do vaig id Bavang Pegalan binuzu timpu magadau di nokosuang no vuhan kotohu id uvang diti.
Id pinombii’an, noihaan o kotongoban id tatanga do momoguno ngaavi do maso gumazo, hobi no doid mobubuvat ngaavi di minamadadi do bavang nokomoi sabaagi ontodonon pomuvaigan.
“Pobuuvatan id timbu habus do baino diti pointantu do au aantakan do toun diti,” ka do songuhun mobubuvat, i Michael Joseph, 41.
Minoboos i Michael do gontob vaig Bavang Pegalan nopo nga notonos gisom 80 piatus om pisosoomo do kotihombus miampai oindamaan id suang timpu tosomok diti.
Kogumuan bavang id po’ompus Trans Pegalan di kopogompit sokukuang no 100 kokompungan do noihaan notuu mantad po di sominggu nakatahib.
Kokudian vaig nga nokoponguntazag nogi do vinakas hidro Pangi, i manaak vinakas lotilik id pototongkop pogu Sabah diti.
Naamot diho, id Nabawan, koonuan vaig tohidang nopo nga nokotimpuun no ountazag binuzu gontob vaig id Bavang Penawan tumimpuun no mingkudi.
Mogigizon id piipio kampung id uvang diho nga pinopoiho nogi do aiso koonuan vaig mantad po di piipio minggu nakatahib.
Kaantakan sandad di okito o timpu magadau do anau, tuminimpuun di kohimpupuson toun nakatahib, om popokito do koonuan vaig nadadi ahal tagazo.
|
