|
18th March, 2010
KOTA KINABALU: Au insan o Koupisan Kotoinaan Kotundunan Am (JPKA) do minomoguno ‘tuhun tanga’ om au mongontok pambalazan montok monongkitoina do koonuan sakadai kotundunan mantad koupisan nokomoi, ka di Montili Kotundaan Mogigizon om Ahal Momoguno, i Datuk Azizah Mohd Dun.
Poingkuo po ka dosido, nokotoimo o boogizan JPKA do sakadai mantad Kotinanan Kobuuon om Koumohigan Kampung (JKKK), Mohoingon Kampung ngaavi toi mantad hahansanon ngaavi layat montok manakadai popouhan do kotoinaan koupisan.
Mantad diho, tuhun ginumuan di kumaandak mokitoina miampai Koupisan Kotundanan nopo nga posoovon om unsubon montok tuutulus do tumuubung id upis ngaavi kotundanan id sosomok.
“Au tokou momoguno ‘tuhun tanga’ toi ejen tu kivaa dotokou do upis di kogonop, iho nopo nga onom Upis Kotundanan Boogizan (PKB) om 26 Upis Kotundunan Uvang (PKD) id pototongkop Sabah do potounda manaak sakadai di pokionuon,” ka dosido.
Minoboos zosido diti kuminaa doid monunuat abal sabaagi minongomi luputasn abal kinoizonon di koniab i pinopoboos do 23 kiis ponipuan tuhun nohoing do nokosuat do boogizan pulis, kopogompit soginumu RM65,000 di toun nakatahib, kogumuan dino naantakan id Inanam, Papar, Keningau, Beaufort om Penampang.
Minoboos i Azizah do upisol toi pakakalaja do JPKA di papapanau kalaja nopo nga tomoimo manambasaan basaan korporat om popokito kad kointutunan sondii doun koupisan montok popointahang dioho do mantad Koupisan Kotundunan.
“Mantad diho, posoovon o tuhun ginumuan mooi hobi poguhu mokiintong kad nokomoi poguhui monoimo nunu noopo kotoinaan montok mongivad dioho tipuan do tuhun di aiso tonggungan.
“Tuhun ginumuan di nokoiho kivaa boogizan ngaavi pointantu do mokianu pambalazan montok proses upalai sakadai kotundunan, pokionuon do popoluput kumaa boogizan pulis miampai tosisikap,” ka dosido.
Ontok udizoo nung kivaa ponipuan diho naantakan tu ahal birokrasi, papasabap upalai do kahaid proses, minoboos i Azizah do: “Minonuu tokou do upisol ngaavi JPKA montok mindau id gana miampai papaanjul abaabazan montok manakadai do tuhun ginumuan.
Ontok ponogi diho, pinotounda o kotoinaan kountol manau-panau om pokikitanan montok monginsomok do mogigizon kampung montok popouhan dioho monongkitoinan miampai boogizan Koupisan Kotundunan,” ka dosido.
Mantad diho, minokianu zosido do mooi o boogizan kokuasaan do kaanu monoizuk om manganu haang tosikpa kumaa doid tuhun di aiso tonggungan, minhahasu sabaagi upisol kotundunan miampai monipu do tinimungan umbanganon do koupisan. Iti nopo nga montok mongivad ahal miaga diho do ouhit vagu.
Pinoposoou i Azizah doid nonomboo boogizan di kumaandak koonuan sakadai kotundunan do pokionuon tuutulus mikot id upis kotundunan uvang toi boogizan om upalai diho nopo nga aiso kabalai.
“Sokio nung kivaa kotinanan ngaavi okon kopolintaan (NGO) toi sukarelawan di aanangan monokodung, ahansan zou dioho do kaanu tumuubung miampai Upis Kotundunan. Kosivatan di pataakon nopo nga aiso kabalai om au momoguno nuununu pambalazan,” ka dosido.
Minoboos zosido do miampai songovian dino, di toun nakatahib, soginumu do 38,331 tuhun mononoimo Sakadai Tuhun Mohoing miampai pinambalai soginumu RM71.5 lizong.
Ka vagu dosido, maganu timpu o boogizan koupisan do sombuhan montok proses upalai mantad tinimungan umbanganon, ahapas iho, poihoon o mongungupalai ngaavi nung upalai dioho pinahantoi toi ko sabahik dino.
“Montok mongungupalai di hiniad o upalai dioho, kakaal kavasa izioho do mokiinsian kumaa doid Koupisan Kotundunan miampai popobuzu kointahangan di tapantod. Miaga po topi do kivaa tanak dioho di togumu nga tanak ngaavi dino nga obohingkang nogi o au kaanu manakadai dioho,” ka dosido.
|
