|
18th March, 2010
KUALA LUMPUR: Model ikonomi wagu (NEM) i maan pointutunai amu’ kopomuhas di kopotutan poinbida’ do mamasok nga’ poposuul di pisokodungan miampai di okon ko’ mamasok, ka do kinopoilaan doid Dewan Rayat di konihab.
Montiri id Koupisan Luguan Montiri Datuk Seri Mohamed Nazri Abdul Aziz minoboros wokon nopo do pisokodungan di kalansanan nopo dilo’ nga’ id sunduk pulitik om kopointutunan doid pongindopuan.
“Mimang tokou do haro pisokodungan id pialatan do ngoduduo bohogian i okon nopo ko’ koponguntung do mamasok, nga’ nogi’ okon ko’ mamasok,” ka disio ontok minonimbar ponguhatan di Datuk Mahfuz Omar (Pas-Pokok Sena) doid Dewan Rayat di konihab.
Mokimoilo i Mahfuz kokomoi kopotimparanan do koroitan mamasok id NEM i pointutunan do amu’ no alaid om nunu o laang montok mongilag do koimbulai kobolingkahangan id pogiolitan tinaru.
Minoboros i Nazri do ningkakaton om kopotutan tinimungan mamasok amu’ poindisanon doid NEM om montok papatantu’ do ahal nokomoi, potitikid laang di onuon kiguno pointaid di koundangan om undang-undang pogun.
“Popokito tokou nopo do mamasok om okon ko’ mamasok kaanu misokodung montok koundaran toinsanan,” ka disio.
Naamot dilo’, minonimbar ponguhatan di Datuk Billy Abit Joo (BN-Hulu Rajang) kokomoi do kogunaan kopogiadasan undang-undang id kopoimaganan sabaagi mamasok om i gunoon doid pogun Sarawak o poiradan, k adi Nazri ahal dilo’ amu’ nuru’ do poindalanon.
Iti nopo nga’ nosusuhut do ningkakaton mamasok nokopogiadang no om nokosompini’ id tolu bohogian miagal di pinosodia’ doid Koundangan Pisompuruan.
Tolu bohogian nopo dilo’ nga’ Orang Melayu, “anak negeri” Sabah om Sarawak nogi’ Orang Asli, ka disio.
Minoboros i Nazri do Koundangan Pisompuruan i gunoon doid poliliput pogun miampai pointalang minamarait do tulun di kosudong pohimogonon sabaagi mamasok om ahal nopo dilo’ pohimagon.
|
