LHDNM minanaak ningkokoton tonggungan media popoinsavat kasaavan mambalai sukai

 

KOTA KINABALU: Huguan Upisol Eksekutif Kotinanan Asil Suang Pogun Malaysia (LHDNM) Datuk Seri Sabin Samitah minanaak ningkokoton tonggungan media id suang popoinsavat om popogiot kinavas kasaavan tinimungan mambalai sukai id pogun diti.

Minoboos isido sokodung potihombus boogizan media mazaa luputan om kapabalan papanau tonggungan kiguno id suang poposuang kasaavan kumaa tuhun ginumuan kokomoi kopotutan mambalai sukai.

“Nung aiso media, saviavi kopoihaan au ahantoi papatazad miampai avasi… saasabap no dino humansan zou pisokodungan piahatan media om LHDNM tuutulus potindooi,” ka disido ontok minamason id Lamai Tosuau LHDNM miampai Media Sabah 2018, id doiti di koniab.

Minoboos isido miampai kivaa sokodung media, boogizan disido nakahantoi pinopoinsavat kopomuuvan sukai pogun kiginumu 9.15 piatus piagahon toun poguhui dino ontok toun nakatahib.

“Iti nopo nga sakadai tagazo media kumaa LHDNM om humansan tokou miampai pisokodungan di potihombus, kadampot tokou ikoton kopomuuvan RM134.7 bilion ontok toun diti,” ka disido.

Naamot dino, minokianu i Sabin saviavi mambalai sukai id pogun diti tuutulus monuhuk tonggungan montok mambalai sukai.

“Izioho di kipotutan mositi mambalai sukai tu LHDNM mongontok haang kumaa noonombo tuhun toi ko komponi di modihin mantad monoodo dino,” ka disido. Berna

 
By :
 
New Sabah Times