ANWAR PINAHABUS DI KONIAB

 

KUALA LUMPUR: Datuk Seri Anwar Ibrahim di koniab noonuan kohobusan tuutulus kahapas nakaanu kasagaan koompunan poimponu di Yang di-Pertuan Agong Sultan Muhammad V.

Kotinanan Pongompunan montok Wilayah ngaavi Persekutuan Kuala Lumpur, Labuan om Putrajaya minitimbungak di koniab om minonimbang kiis kopokinsianan koompunan poimponu disido, tumanud kointahangan Istana Pogun. Huguan ginumuan PKR dino papanau ukum tolungku himo toun kahapas nokogompit miampai kahasaan liwat.

Sultan Muammad V dino minonoimo kinasamanan di Anwar, savo disido i nogi Polosiden PKR Datuk Seri Dr Wan Azizah Wan Ismail om Kumoduvo Polosiden PKR Datuk Seri Mohamed Azmin Ali id Istana Pogun di doungadau koniab.

Anwar poguhui dino pinasaga humabus wad Hamin Pongusapan Rehabilitasi Cheras, tampat disido papanau kopononinduhian tu nazazakan, om tuutulus kuminaa Istana Pogun montok tuminoguvang Yang di-Pertuan Agong. Minamanau miampai tinanud kulita om motusaikol pulis, Anwar nokoikot id Istana Pogun di jam ko 11.50 minsusuvab om tinoimo tumoguvang Seri Paduka kahapas dino.

Lamai sumoomo dino naazu somok sanjaam.

Kinohobusan di Anwar i tinolungku mantad po di Vuhan Koduvo 2015 dino nadadi hobi kilati songian tinoodo ino sangadau poguhui tuhun Islam monoimo koikatan Ramadan, baino.

Kinohobusan disido mantad tolungku i nogi vookon dandi Pakatan Harapan i naampazat nogi PKR, ontok pomihian Tadau Kotohu nakatahib, notuhuk do sominggu no songian nopupusan pomihian.

Malaysia insan po vagu nadadi gogondoon media okon nopo kinoizonon nogi habus pogun i tuminimung mantad po di minsusuvab id hamin pongusapan om Istana montok tumanud kobuuon kohobusan bagas kumoduvo huguan montili om nogi bagas montili kousinan.

Uvang habus Istana Pogun nga noponu susumokodung Anwar.

Anwar papanau ukum tolungku himo toun ontok di Vuhan Koduvo 2015 kahapas Kuut Persekutuan pinopotindooi kotontuan nakahasa id kogompita kiis liwat.

Anwar, i tinolungku id Tolungku Sungai Buloh, id ponimpunan dino pisosoomo pohombuson ontok ko 8 Vuhan Koonom. Bernama

 
By :
 
New Sabah Times