Razwan Garidi bontugan Sugandoi Telupid 2018

 

TELUPID: I Razwan Garidi, nosili bontugan Pinialaan Sugandoi Ramai Kaamatan nayatan Watas Telupid 2018 i nokoindalan doid Lintuhun Kounsol Watas Kakadayan Telupid do hiti.

Minogowit isio do sinding ‘Kakal Kosorou Diya’ (Benard Laimen) om Ralan Piupusan (Edwin Arewin). Tukad koduo nasanganu di Michelle Kasianus, 24, om kotolu nopo nga’ i Velerice Paimin, 18.

I Razwan, 30, nakaramit tutungkap RM1,500 miampai trofi om setifikit mongobi’ do Watas Telupid kumaa pialaan Sugandoi nayatan pogun id KDCA do ko 21 gisom 26tw obontol diti.

Naamot dio’ Michelle dii Velerice sopipoopori nakaramit RM500 om RM400 mitonggoi do trofi om nogi’ setifikit kinotonudan.

Duo kawagu finalis i nokoindikau tukad ko 4 om kolimo, sopipoopori nakaramit tutungkap ponuau-suau RM300, trofi om setifikit.

I Ponorikohon Komitikuasa’ Tokoro’ Sugandoi Watas Telupid, Tommy Amir pinopoilo do koliilimo finalis dilo’ nopili’ mantad di 22 tulun i tuminanud doid panaasan di ko 11tw Kolimo katatalib.

Suai ko’ momili’ mongobi’ watas Telupid kumaa nayatan pogun, pialaan dilo’ montok po nogi’ do momologkus bakat wagu id kaganaan seni momolihis om minamason diolo’ do amu’ momolihu boros sandad Kadazandusun. Momilantoi nopo do panantaban dilo’ nga’ ii Roger Enty, Laura Tiwon om i Adrian Dauli.

Tutungkap pinotunui di Upisor Watas Telupid i Benedict Asmat i po nogi’ Ponorikohon Takawas Kopoonjuran Kaamatan nayatan watas Telupid 2018.-Di JAMES LEONG

 
By :
 
New Sabah Times