ONOM NGO, CBO NOKOTOIMO GERAN KOTUNDAAN LESTARI SHELL

 

KOTA KINABALU: Onom organisasn Tinan Okon Polinta (NGO) om Organisasi Kinontodonon Komuniti (CBO) nokotoimo Geran Kotundaan Lestari Shell mantad Shell Malaysia di Tadau Koiso.

Montili Pidagangan om Pomounan, Datuk Seri Panglima Wilfred Madius Tangau minoboos, pongkimamaan komponi dino apatut ozoon tu kaanu monuhung polinta popotihombus abaabazan kotundaan pointantu id pogun diti.

“Suvai ko adadi pamain kopoguhu id suang pomounan tumau om gas, pongkimamaan Shell Malaysia id lahan okon potihombus kapanaak pomitanan poingkuo NGO kinoizonon om CBO kaanu monuhung manakadai kumaa mogiigizon posoihi,” ka disido.

“Sabaagi Komontilian di kitonggungan montok kotundaan pomounan, mogovit tokou hobi ginumu kotundaan pomounan kumaa Sabah miampai dino kaanu mongukab kosivatan pakalajaan, manaak sakadai kumaa kohobusan suang pogun om kapanaak tanda tavasi kumaa abaabazan spin-off ekonomi,” ka disido.

Minoboos i Madius, kapataakan geran dino okon nopo kaanu monuhuk ikoton kotundaan komontilian disidio nga id lahan tuutulus kaanu kapanaak kovosian sandad ngaavi pogun miampai lahan di pointantu miampai kotundaan timpu tanau.

Minoboos i Madius dino ontok pinopohombus pason id Lamai Kapataakan Geran Kotundaan Pointantu Projik Komuniti Shell ko 10 pototongkop Malaysia.

Naamot dino, Potunud Tagazo Komponi Shell Petroleum Sabah, Prithipal Singh minoboos miampai geran kousinan dino, NGO om CBO monoodo projik kotundaan pointantu i kapanaak kovosian kumaa tinimungan id pototongkop Malaysia.

“Mantad po pinointutun di toun 2008, somok RM4 lizong noguno kumaa 96 projik di misuvai id pototongkop pogun.

“Id ikoton dino, geran diti kiguno sabaagi mogovit montok papavasi projik kotundaan lestari i papanaon do NGO om kinontodonon komuniti organisasi.

“Geran pataakon kumaa projik ngaavi nakatantu, tumanud kovosian potihombus kumaa mogiigizon om pilotian di pinokito kumaa kosudangan dino,” ka disido.

Onom mononoimo geran dino nopo nga Konsultasi Symbiosis, Binturong Alam Ventures, 1StopBorneo Wilflife, The Tuyang Initiative, Ai Brique Engineering om EcoKhights.

 
By :
 
New Sabah Times