Duvo kusai nosukod, songuhun dazanak tinaan do APMM tu poinsanganu kakamot boom sada

 

Di NAZRINI BADARUN

TAWAU: Duvo kusai nosukod om songuhun dazanak tinaan do Oginsi Kopokuasaan Maritim Malaysia (APMM) di kahapas natantaman minonginsada momoguno bakaang koobus id kavaigan Bohey Dulang, di minsusuvai koniab.

Minoboos i Huguan Zon Maritim Tawau, Kapten Maritim Romli Mustafa, do ontok o puu padau ponoihi APMM pinapapanau ponoihian id Sektor Pengoperasian toi id hivang soihion, tinaan om pinolisa iso padau tonini monginginsada di kiikila jaam ko 1.16 minsusuvab.

Tumanud di Romli, asil pinomolisaan dino noihaan do kivaa duvo kusai nosukon om songuhun tanak kusai bangsa bajau Palauh, i aiso nuununu dokumen kointutunan sondii, kiumul 8 gisom 40 toun.

“Id pinomolisaan kotihombusan kuminaa doid padau nokomoi, nosomonan onom butul natantaman do boom sada i kikotumbazaan gunoon dioho montok kaanuan sada,” ka disido.

Savi avi do tuhun dino om padau ponginsada kogompit tinaan om nobvit id jeti Kem Azumi, Semporna, montok ponontohan kotihombusan om kiis dino soizukon id siibo Akta Ponginsadaan 1985 om Akta Imigresen 1953/63.

Ontok ponogi diho, minoboos i Romli, do tapanazan monginsada momoguno kavo boom sada nopo nga kadaandang undang-undang tu momiumbak ekosistom daat om kaang.

Ka disido, intangan kozo totootopot do APMM kumaa tapanazan momboom sada om haang topodos onuon kumaa nonomboo tuhun di oihaan kogompit id tapanazan nokomoi.

Id komi kotihombusan, ahansan om poingandad idisodo do tuhun ginumuan montok popobuzu nunu noopo kopoihaan kogompit tapanazan di kadaandang om pogohimuvan hobi no id kavaigan Tawau.

Nunu noopo kopoihaan kavasa pobuzuon miampai monuubung id numbul MERS 999 toi Hongkod Operasi DM18 id numbul 089 750116, ka disido.

 
By :
 
New Sabah Times