APAT NOPUJULAN KINIOPON SONGUHUN NOSINDUAHAN NOONSULAN KUSAI NAAVUK

 

DI NAZRINI BADARUN

TAWAU: Saasabap no do papanau id suang koozuzuvo naavuk, apat tuhun kaampai no songuhun susumikul kusai noduso id suang kohigaganan pinopoompit apat padsakazan, di kosuab koniab.

Huguan Pulis Uvang, ACP Fadil Marsus minoboos kinantakan dino nantakan di kuang hobi jam ko 1.30 minsusuvab id Talun-alun Chong Thien Vun.

Munggui i noduso id suang kinantakan dino Dicson Lim Kien Shing, 16, Hiew Nyuk Wei, 30, Clarence Wong Vui Kit, 21, om Chong Wei Chan kiumul 21 toun.

Montok munggui di nosinduahan vagu Chin Guan Xiong, 21, notipu takod gibang om Olivia Chong Oi Yun kiumul 34 toun nosinduahan tokuudi.

Asil pinonoizukan noihaan poguhui kinantakan padsakazan kavo Toyota Vios id suang pamanaan mantad ponong kakadazan Tawau pougadan kumaa Talun-akun Tiku.

Minoboos i Fadil ontok nokoikot id Talun-alun Chong Thien Vun kahapas Biizungon Kubota padsakazan nokogompit kikotumbazaan au naanu minamagaga poguhui nakagavad om nokosuang lahan doguvang.

“Kahapas dino, Toyota Vios dino nokolumpak vagu padsakazan kavo Toyota Hiace, Perodua Bezza om Perodua Myvi miampai piipio tuhun i maamaso songindikau id uvang pataadan kulita Hongkod Komersil BDC (1Arena),” ka disido.

Saasabap no do mantad kohigaganan dino nontodonon do munggui nopujulan kiniopon id tampat kinantakan montok di nokotoguvang kosinduahan noovit kumaa Hamin Pongusapan Tawau.

Ka disido, asil pinonoizukan kopoguhu noihaan kohigaganan dino nontodonon mantad koulalaho papanau Toyota Vios tu papanau id suang koozuzuvo naavuk om au nakahantoi minamagaga padsakazan disido.

Koponoizukan kakal papanaon id siibo Seksyen 44 Akta Padsakazan Talun-alun (APJ) 1987.

Minoboos i Fadil ontok po nogi dino ontok kinantakan pulis trafik maamaso monoodo kapanahaban talun-alun poinsomok pasar Giant.

Sundung i do ingkaa papanau Toyota Vios i nontodonon do kohigaganan dino au po nakavazaa kapanahaban talun-alun i pinapanau dino.

 
By :
 
New Sabah Times