Imigresen nakapanaan koonduan Indonesia noihaan nokogompit abaabazan momilasu kointutunan

 

KOTA KINABALU: Koupisan Imigresen Sabah minanaan songuhun koonduan tuhun Indonesia tu noihaan nokogompit id suang abaabazan momilasu suat kogompit kotoinaan imigresen.

Koonduan kiumul 28 toun dino nopo nga songuhun mantad duvo tuhun i pinolisa id iso kadai toniini id Internatin Flat L, Batu 2.5, talun-alun Utara, Sandakan, do tinimungan upisol om puu Koupisan Imigresen Sandakan ontok di kuang hobi jam ko 12.40 doungadau songkoniab.

Potunud Koupisan Imigresen Sabah, Musa Sulaiman id suang kointahangan dino di koniab minoboos tuhun koduvo ino nopo nga songuhun kusai tuhun kinoizonon kiumul 31 toun i pinolisa id suang Ops Mega 3.0 (SERKAP) i hinuguan di Kumoduvo Panakadai Potunud Imigresen Azlan Shah Hashim dino pinoidu miampai jamin pulis.

Koonduan dino vagu tinaan id Hongkod Panaanan Naamot Sungai Sibuga montok haang sumusuut.

Tumanud di Musa piipio suat miaga do lisin papanau sompomogunan, dahin suat IMM13, foom upalai Koupisan Kopolijistahan Pogun, foom kookunan pisasavaan kaampai no foom kookunan pisasavaan habus pogun, buuk pasport sompomogunan Pakistan i kototongob, suat upalai sumuang, usin om ogumu po suat kogompit nagamu mantad koonduan om kusai dino.

Nagamu nogi ka di Musa piipio koumatan miaga do misin panaap, misin pamabang, kamera, dakwat om piipio kad opuak i au po notoina.

Ka disido kiis dino soizukon tumanud Seksyen 55D Akta Imigresen 1959/63 (pinoundahiu 2002) ino nopo nga monoodo toi ko momilasu toi ko popoundahiu suat montok gunoon sabaagi visa, poomit, pas toi ko kopotutan. Bernama

 
By :
 
New Sabah Times