Puu Dewan Layat onuan kopoingatan au momoguno boos talaat

 

KUALA LUMPUR: Yang Dipertua Dewan Layat Datuk Mohamad Ariff Md Yusof minanaak kopoingatan kumaa saviavi Puu Parlimen mooi mintamong koulalaho om au momoguno boos ngaavi tongokodou miampai kivongi azamut id suang Dewan Layat.

Mohamad Ariff minoboos haang tokodou kavasa onuon id siibo Kootulan Mitingan 44 (2) kaampai no monuu dioho humabus mantad dewan montok iso timpu nakatantu.

“Nung boos ngaavi dino oboos mantad dino popointahang zou insan po vagu do au zou minduvo montok maganu haang kumaa noonombo puu Yang Berhormat i au kahantoi tumanud kootulan ngaavi mitingan,” ka disido kahapas nokopupus pisimbaan sinuat.

Mongintong isido kumaa boos azamut i pinahabus di Datuk Seri Bung Moktar Radin id suang kinantakan pioduan piahatan Puu Parlimen Kinabatangan dino miampai Willie Mongian (PH-Puncak Borneo) om Su Keong Siong (PH-Kampar) ontok Tadau Koduvo (7 Vuhan Kavahu).

Miampai pinopohombus panansahan disido, Mohamad Ariff minoboos boos ngaavi au avasi dino nakahabus no haid do puu ngaavi Parlimen di suvai poguhui diti, id nombo au mamantang om kopomiumbak Dewan Layat.

Pinopointahang isido Kootulan Mitingan 36 (4) manakadai nopo nga adadi kahasaan montok puu ngaavi dewan momoguno boos au avasi.

Ka disido sundung tu Puu Dewan Layat i minonoodo kahasaan dino minokiampun om minongodong mahik boos ngaavi au avasi dioho, nga ino okito sabaagi ‘melepas batuk di tangga” nogi kivaa i monguhit kahasaan dino.

“Kokomoi haang Yang Berhormat Kinabatangan (Bung Moktar) om kobobooson kivongi azamut id suang lamai di ko 7 Vuhan Kavahu nakatahib, kiangkab zou popoiho nung koulalaho di miaga ouhit, Yang Berhormat Kinabatangan pohobuson mantad Dewan i tabaakas diti do tuutulus montok iso timpu miaga di pinakasadai id siibo Kootulan Mitingan 44,” ka disido. Bernama

 
By :
 
New Sabah Times